5S සංකල්පය කාර්යාලයටත් ජීවිතයටත්

මොකක්ද මේ 5S???

ජපනා හපනා කියල කතාවක් අහල ඇතිනේ. මේකත් ඉතින් ජපනගෙම වැඩක් තමා. අපි කවුරුත් දන්නවනේ, ජපානය කියන්නෙ කාර්මික ක්ෂේත්‍රයෙන් ඉතා ඉහළ දියුණුවක් ලබල තියෙන රටක්ය කියන එක. ජපානෙ එච්චර දියුණු රටක් වුනාට, ඒ රටේ ඔය කාර්මික නිෂ්පාදන වලට අවශ්‍ය කරන ස්වභාවික සම්පත් අඩුයි, ඒ වගේම දෙවෙනි ලෝක යුද්දෙදි විශාල විනාශයක් වුන රටක්. ඉතින් එහෙම තත්ත්වයක් තියෙද්දිත් මේ රට මෙච්චරටම දියුණු වුනේ කොහොමද? ඒ දියුණුවේ රහස මොකක්ද?

ඒ රහස් අතරින් ප්‍රධානතම රහසක් තමා මේ කියන්න හදන 5S කියන සංකල්පය. ඇත්තටම කිව්වොත් 5S කියන්නෙ කියන්නෙ කර්මාන්ත ශාලාවක් කළමනාකරණය කිරීම සඳහා ඇති කරපු සංකල්පයක්.

5S – S අකුරු 5 ක්. ජපන් භාෂාවෙ තියෙන Seiri, Seiton, Seisô, Seiketsu සහ Shitsuke කියන ජපන් වචන පහේ මුල් අකුරු අනුව තමා මේ සංකල්පය 5S කියල හඳුන්වන‍්නෙ. මේ වචන පහට සමාන තේරුම් තියෙන Sort, Set In Order, Shine, Standardize සහ Sustain කියන ඉංග්‍රීසි වචන යොදල ඒක ඉංග්‍රීසියට පරිවර්තනය කරල තියෙනව. මේකට “ස” යන්නෙන් පටන් ගන්න, සංවිධිත බව - සුපිළිවෙළ - සුපිරිසිදුබව - සමමිතීය - ශික්ෂණය යන සිංහල වචන පහක් යොදල මේක සිංහලයටත් පරිවර්තනය කරල තියෙනව. අපි මේ එක එකක් ගැන සරලව තේරුම් ගනිමු.

Seiri– Sort – සංවිධිත බව - මේ කියන්නෙ අනවශ්‍ය දේවල් ඉවත් කරල අවශ්‍ය දේවල් තෝරාගන්න කියල

Seiton – Set In Order – සුපිළිවෙළ -

කලින් පියවරේදි තෝරගත්ත අවශ්‍ය දේවල් ටික පිළිවෙලකට තියන්න කියන එක

Seisô – Shine – සුපිරිසිදුබව -

පිළිවෙලකට තියල විතරක් මදි, ඒ දේවල් හොඳ පැහැදිලි පිරිසිදු තත්ත්වයෙන් තියෙන්නත් ඕන

Seiketsu – Standardize – සමමිතීය -

මේ දේවල් පරිහරණය කරන එක අපි ප්‍රමිතියකට අනුව උසස් තත්ත්වයෙන් කරන්න ඕන

Shitsuke – Sustain – ශික්ෂණය -

එහෙම කරාට පස්සේ අපි මේ දේවල් අඛණ්ඩව පවත්වාගෙන යන්නත් ඕන.

දැන් මේක ටිකක් ඉස්සරහට ගිහින් 8S කියල සංකල්පය දියුණු වෙලා තියෙනව. එතනදි අලුතෙන් එකතුවෙලා තියෙන්නෙ Safety, Systematic සහ Satisfaction කියන සංකල්ප. ඒ කියන්නෙ ආරක්ෂාව තහවුරු කිරීම, ක්‍රමාණුකූල කිරීම සහ තෘප්තිමත් භාවය කියන දේවල්.

ලොකු දෙයක් වගේ පෙනුනට ඉතාම සරල දෙයක්. ඔන්න ඔහොම තමා 5S සංකල්පය ක්‍රියාත්මක වෙන්නෙ. මේ කියපු දේවල් කට පාඩම් කරනවට වඩා ඒකෙ අදහස ඔලුවට ගන්න එකයි වැදගත් වෙන්නෙ. එතකොට ඉබේටම අපි අතින් මේ සංකල්පය ක්‍රියාත්මක වෙනව.